Silfur og brons á Evrópumóti í hópfimleikum

Silfur og brons á Evrópumóti í hópfimleikum

Iðkendur fimleikadeildar Selfoss sem kepptu á Evrópumótinu í hópfimleikum dagana 1. – 4. desember í Portúgal náðu stórkostlegum árangri með liðum sínum, þau komust öll á verðlaunapall. Stelpurnar okkar í stúlknaliði Íslands hlutu silfurverðlaun eftir frábærar æfingar á öllum áhöldum, aðeins 0,1 stig á eftir liði Svíþjóðar sem urðu Evrópumeistarar. Sindri Snær sem keppti með blönduðu liði unglinga hafnaði í 3. sæti með liði sínu sem stóð sig einstaklega vel í harðri keppni. Árangur íslensku liðanna er eftirtektarverður en Ísland átti 4 lið á mótinu, 2 lið í unglingaflokki og 2 í fullorðinsflokki og komust þau öll á verðlaunapall. Kvennalið Íslands vann Evrópumeistaratitil og karlalið Íslands hafnaði í 2.sæti en í því liði er Eysteinn Máni sem er uppalinn hér á Selfossi. Fimleikadeild Selfoss er afar stolt af sínum iðkendum og óskar þeim innilega til hamingju árangurinn á Evrópumótinu.

Shooting star verðlaun hafa verið veitt á mótinu frá árinu 2018 sem einn fimleikamaður og ein fimleikakona hljóta. Verðlaunin miða að því að setja fimleikafólk með einstaka sögu í sviðsljósið. Auður Helga Halldórsdóttir hjá fimleikadeild Selfoss er 16 ára gömul og hlaut verðlaunin þetta árið. Auður Helga er ekki aðeins frábær fimleikakona í landsliði Íslands, hún er einnig hæfileikarík knattspyrnukona og hefur einnig verið valin í landsliðsverkefni þar auk þess sem hún á glæstan feril í frjálsum íþróttum. Fyrir utan íþróttahæfileika sína spilar Auður Helga á flautu og sinnir skólanum af kostgæfni. Hún er mikil fyrirmynd og innblástur fyrir komandi kynslóð. Fimleikadeildin óskar Auði Helgu til hamingju.