Fjölmennasti Frjálsíþróttaskólinn frá upphafi

Fjölmennasti Frjálsíþróttaskólinn frá upphafi

Frjálsíþróttaskóli UMFÍ var haldinn á Selfossi dagana 14. til 18. júlí og heppnaðist hann mjög vel. Að þessu sinni voru krakkarnir á aldrinum 11 til 15 ára. Krakkarnir voru mjög ánægðir með skólann og eru strax farin að hlakka til að koma aftur á næsta ári. Þetta var í sjötta sinn sem skólinn er haldinn á HSK-svæðinu. Bæði í fyrra og í ár var metfjöldi en það voru alls voru 38 börn sem tóku þátt í skólanum í ár. Krakkarnir komu flest frá Suðurlandinu, þó voru nokkur af höfuðborgarsvæðinu.

Dagskrá skólans var mjög fjölbreytt þar sem til að mynda voru kvöldvökur á hverju kvöldi og fjölbreytt hreyfing allt frá hefbundnum frjálsíþróttaæfingum, til sundsprells og ratleiks. En markmið skólans er að kynna og breiða út frjálsíþróttir á Íslandi. Fjölmargir þjálfarar og aðstoðarmenn aðstoðuðu við að gera skólann sem fagmannlegastan og skemmtilegastan. Skólinn fór fram við frábærar aðstæður þar sem stutt er í alla aðstöðu sem nota þarf, til að mynda frjálsíþróttavöllinn, Tíbrá, Selið, íþróttahúsið Iðu og Sundhöll Selfoss.

Þannig gegnir skólinn mikilvægu hlutverki í að opna augu ungmenna fyrir ágæti íþróttaiðkunnar og styðja fjölmargar rannsóknir þá fullyrðingu að ungmenni sem stunda íþróttir leiðast síður út í óreglu síðar á lífsleiðinni. Síðast en ekki síst öðlast ungmennin tækifæri til að kynnast hvert öðru og mynda tengslanet og auka hæfni sína í mannlegum samskiptum.

Skólanum lauk með Frjálsíþróttaskólamóti á föstudeginum. Þá rigndi all hressilega en veðrið hafði annars verið ágætt alla vikuna. Þrátt fyrir úrhelli var vindur löglegur og voru margir krakkar að bæta sinn persónulega árangur sem er frábært.

Frjálsíþróttaskólinn vill þakka öllum þeim fjölda fyrirtækja sem lögðu þeim lið, sá stuðningur er ómetanlegur, en þau voru: MS, Landssamband garðyrkjufræðinga, Nettó, Hafnarnes Ver, Almarsbakarí, Guðnabakarí, Kjötvinnslan Krás, Bónus, Kökugerð HP, Kjörís, Myllan, Nathan&Olsen, Dominos, Landsbankinn, Íslandsbanki, Rúmfatalagerinn, Selfossbíó,  SS og svo Kristján Gestsson kartöflubóndi í Forsæti IV.

Takk fyrir okkur,
Ágústa og Fjóla Signý
Yfirumsjónarmenn Frjálsíþróttaskólans á HSK-svæðinu

Hressir krakkar með viðurkenningarskjöl að loknu Frjálsíþróttaskólamóti.
Mynd: Umf. Selfoss/Birgir Aðalbjarnarson