21 feb Hjálmar Vilhelm með HSK met í fimmtarþraut
Meistaramót Íslands í fjölþrautum fór fram í Hafnarfirði helgina 19.-20.febrúar sl. Hinn 14 ára fjölhæfi Hjálmar Vilhelm Rúnarsson frá Selfossi keppti í fimmtarþraut í flokki 15 ára og yngri. Hann náði að bæta sinn besta árangur í öllum greinunum fimm og toppaði árangurinn með því að setja HSK met í þrautinni með 2380 stigum. Fyrra metið var 2096 stig, sett árið 2017 af Sindra Frey Seim Sigurðssyni. Hjálmar hljóp 60m grind á tímanum 10,04s, stökk 1.69m í hástökki, 4,91m flaug hann í langstökki, kastaði kúlunni 11,86m og endaði á því að hlaupa 800m hlaup á 2:27,83mín. Sannarlega glæsileg byrjun á keppnistímabilinu hjá Hjálmari Vilhelmi en hann náði öðru sæti í þrautinni með þessum árangri og er lengst til vinstri á myndinni sem fylgir fréttinni.
