Sex verðlaun á Världsungdomsspelen í Gautaborg

Sex verðlaun á Världsungdomsspelen í Gautaborg

Frjálsíþróttadeild Selfoss tók þátt í Världsungdomsspelen (Gautaborgarleikarnir) sem haldnir voru í 25.sinn á Ulleví- leikvangingum í Gautaborg dagana 17.-19.júní sl. 30 keppendur frá frjálsíþróttadeild Selfoss tóku þátt  en deildin hefur tekið þátt annað hvert ár og er þátttakan í mótinu skemmtileg og góð upplifun fyrir iðkendurna sem margir eru að stíga sín fyrstu skref á alþjóðlegu móti.

Árangurinn var frábær þetta árið hjá iðkendum deildarinnar og  voru sex verðlaunapeningar hengdir um háls okkar keppenda og er það langbesta frammistaða deildarinnar til þessa. Auk þess slógu þau 12 HSK met auk margra persónulegra bætinga.

Hjálmar Vilhelm Rúnarsson (14 ára) vann til þrennra verðlauna á mótinu. Hann  náði þeim frábæra árangri að vinna kúluvarp með góðri bætingu er hann varpaði kúlunni 13,00m, hann vann til silfurverðlauna í spjótkasti  á nýju HSK meti er hann kastaði spjótinu 50,86m og í hástökki stórbætti hann sig með því að vippa sér yfir 1.79 og vinna til silfurverðlauna. Daníel Breki Elvarsson (16 ára) náði þeim glæsilega árangri að bæta sig um marga metra í spjótkasti og sigra á nýju HSK meti þegar hann kastaði spjótinu 60,48m.  Bryndís Embla Einarsdóttir (13 ára) stóð sig vel og vann til tvennra verðlauna, hún kastaði spjótinu 34,95metra og vann til silfurverðlauna auk þess sem hún bætti sig í hástökki þegar hún stökk yfir 1.54m og krækti sér í bronsið.  Glæsilegur árangur hjá þessum stórefnilegum iðkendum deildarinnar.

              Eydís Arna Birgisdóttir (15 ára) hljóp 300m grindahlaup á tímanum 46,47sek og setti í leiðinni fjórfalt HSK met en hún bætti metið í flokkum 15 ára, 16-17 ára, 18-19 ára og 20-22 ára.  Ásta Dís Ingimarsdóttir (15 ára) hljóp 2000m hlaup á tímanum 7:25,60 mín og setti fimmfalt HSK met í leiðinni, hún bætti metið í flokkum 15 ára, 16-17 ára, 18-19 ára, 20-22 ára og í kvennaflokki.   Álfrún DIljá Kristínardóttir (16 ára) bætti eigið HSK met í sleggukasti í flokki 16-17 ára er hún kastaði sleggjunni 49,34m.   Þorvaldur Gauti Hafsteinsson keppti á mótinu fyrir Helsingborg og hljóp 800m á tímanum  2:06, 93 mín  sem er langt undir HSK metinu en hann hefur æft þar það sem af er þessu ári en kemur heim í sumar.