Árangur á Íslandsmóti karla

Selfoss sendi fyrst lið í Íslandsmótið í meistaraflokki keppnistímabilið 1981–1982. Strákarnir kepptu fyrst tímabilið 1981–1982 í 3. deild og enduðu í 8. sæti af 10 liðum. Ekki tókst að manna lið árið eftir en keppnistímabilið 1983–1984 lék liðið í 3. deildinni og endaði í 7. sæti af níu liðum. Við tóku þrjú ár í 3. deildinni en vorið 1987 vann liðið sig upp í 2. deild. Næstu þrjú ár lék liðið í 2. deild en komst upp í 1. deild vorið 1990. Fyrsta árið í efstu deild endaði liðið í 11. sæti af tólf liðum og rétt náði að halda sér uppi.

Liðið sem spilaði fyrsta tímabil Selfoss í efstu deild keppnistímabilið 1990–1991.

Næstu þrjú ár þ.e. frá hausti 1991 til vors 1994 náði karlalið Selfoss besta árangri sínum. Liðið endaði í 3. sæti í deildarkeppninni og lék til úrslita um Íslandsmeistaratitilinn við FH 1992 en tapaði. Árið eftir endaði liðið í 5. sæti í deildinni og árið þar á eftir í 3. sæti. Liðið komst einnig í úrslit bikarkeppninnar þar sem liðið tapaði fyrir Val. Keppnistímabilið 1994–1995 varð Selfossliðið í 9. sæti og árið eftir í 8. sæti. Árið 1997 féll liðið niður um deild en komst upp ári síðar eftir að hafa unnið 2. deildina. Liðið lék eitt ár í efstu deild og féll aftur niður vorið 1999. Næstu tvö árin var liðið í 2. deildinni en vann hana svo aftur vorið 2001.

Árið 2001 fækkaði liðum í Íslandsmótinu og kepptu þau öll, fjórtán talsins, í einni deild. Sama fyrirkomulag var árið eftir. Fyrra tímabilið endaði Selfoss í 10. sæti en það síðara í 14. sæti. Nýtt fyrirkomulag var reynt næstu tvö árin þar á eftir þ.e. 2003–04 og 2004–05. Þá var liðunum skipt upp í tvo riðla; suður-riðil og norður-riðil. Selfoss lék í Suður-riðli. Efstu fjögur liðin úr hvorum riðli léku síðan í úrvalsdeild um deildarmeistaratitilinn en hin liðin léku í 1. deild. Síðan var úrslitakeppni sex efstu úr úrvalsdeild og tveggja úr 1. deild. Selfoss endaði í 12. sæti fyrra tímabilið og í 13. sæti síðara tímabilið. Næsta tímabil þ.e. 2005–2006 léku öll liðin í einni deild og endaði Selfoss í 14. og neðsta sæti.

Tímabilið 2006–2007 var deildinni aftur skipt í tvennt þ.e. í úrvalsdeild og 1. deild. Selfoss lék í 1. deild og endaði í 5. sæti af 8 liðum. Næstu þrjú tímabil vann liðið sig upp um 1–2 sæti á ári og vann svo 1. deildina vorið 2010. Árið eftir lék liðið í úrvalsdeild en endaði í 8. og neðsta sæti og féll niður í 1. deild. Þetta sama tímabil var Selfoss einnig með lið í 1. deild sem endaði í 4. sæti af sjö liðum. Næstu sex tímabil eða frá 2011 til 2016 lék liðið í 1. deild. Fyrsta tímabilið endaði liðið í 6. sæti, næsta í 4. sæti og þriðja í 5. sæti, þau þrjú tímabil eftir það lenti liðið í 3. eða 4.sæti og fór í umspil en ekki komist upp í úrvalsdeildina fyrr en vorið 2016. Liðið hefur síðan leikið í úrvalsdeildinni og lent tvisvar í 5. sæti og tvisvar í 2. sæti deildarinnar, með jafnmörg stig og liðið í efsta sæti. Liðið varð síðan Íslandsmeistari árið 2019 sem er jafnframt fyrsti titill liðsins.

Liðið sem fór upp í efstu deild árið 2016 eftir umspil gegn Fjölni.

Íslandsmeistaralið Selfoss árið 2019.

Íslandsmót karla – Selfoss