Tveir flottir sigrar í 3. flokki

Tveir flottir sigrar í 3. flokki

Bæði liðin í 3. flokki karla unnu góða sigra um helgina. Selfoss 1 vann Þrótt á útivelli 24-29 á föstudag og í gær sigraði Selfoss 2 lið ÍR-inga sannfærandi 31-19 á heimavelli.

Selfoss 1 byrjaði frábærlega gegn Þrótti og komst 0-6 yfir. Mjög góð vörn og 5 skot varin hjá Sölva markmanni á þessum kafla hafði þar mest að segja. Slakaði liðið þá á og Þróttarar komust inn í leikinn. Stuttu síðar var staðan allt í einu 5-6. Voru Þróttarar þá komnir á bragðið og hélst leikurinn jafn út hálfleikinn.

Í seinni hálfleik var Selfoss með yfirhöndina og við það að slíta sig almennilega frá heimamönnum. Það var ekki fyrr en á seinustu 10 mínútunum sem þeir náðu að gera það algjörlega og unnu að lokum 5 marka sigur.

Sóknarleikurinn heilt yfir var nokkuð góður. Ánægjulegt er að sjá að heilt yfir eru leikmenn alltaf að að átta sig betur og betur á hlutverkum sínum. Varnarleikurinn var góður í byrjun og á seinustu 10 mínútunum þegar á þurfti að halda.

Selfoss 2 var aldrei í vandræðum með ÍR-inga. Fyrir leikinn var Selfoss búið að spila þrjá leiki og tapað öllum. Hafði liðið leikið mjög fína kafla í þeim öllum en voru þeir bara ekki nægilega langir. Að þessu sinni small varnarleikurinn og sóknarleikurinn  algjörlega inn. Sérstaklega þó vörnin sem kom Selfoss í 8-3 eftir 15 mínútna leik og hélt ÍR-ingum undir 20 mörkum í leiknum.

Selfoss var 17-9 yfir í hálfleik og vann 12 marka sigur að lokum. Liðið bætti sig mikið í þessum leik og gaman að sjá svo marga leikmenn eiga góðan leik eins og raunin var. Að þessu sinni lék liðið vel í vörn og sókn nær allan tímann eða mun lengur en það hefur verið að ná í seinustu leikjum. Vonandi verður áframhaldandi þróun í þeim efnum.