92. héraðsþing HSK haldið á Borg

92. héraðsþing HSK haldið á Borg

92. héraðsþing Héraðssambandsins Skarphéðins verður haldið í félagsheimilinu Borg í Grímsnesi á laugardag og hefst stundvíslega kl. 10:00 og stendur til kl. 17:30. Afhending þinggagna er frá kl. 9:30. Þing HSK hafa þrisvar sinnum verið haldin á Borg, árin 1968, 1976 og 2000.

Rétt til setu á þinginu eiga 122 fulltrúar frá 59 aðildarfélögum HSK og tveimur sérráðum sambandsins.

Á þinginu kemur út ríkulega myndskreytt 88 blaðsíðna ársskýrsla um starfsemi HSK á liðnu ári. Auk hefðbundinna þingstarfa verður val á Íþróttamanni HSK 2013 kunngjört á héraðsþinginu. Fimm manna valnefnd sá um að velja íþróttamanninn líkt og undanfarin ár, en alls voru 21 íþróttamaður í jafnmörgum greinum tilnefndir. Hafa þeir allir verið boðaðir á verðlaunahátíð HSK sem haldin verður á Borg kl. 15:15 á laugardag.

Stjórn HSK mun leggja fram 26 tillögur á þinginu og þá mun kjörnefnd leggja fram tillögu að nefndar- og stjórnarskipan HSK 2014.

Ljóst er að breytingar verða á stjórn sambandsins, en Hansína Kristjánsdóttir, sem kosin var gjaldkeri á síðasta héraðsþingi, verður ekki í kjöri. Þá gefur Lára B. Jónsdóttir ekki kost á sér til endurkjörs, en hún átti sæti í varastjórn. Kjörnefnd sem kosin var fyrir nokkru hefur ekki lokið störfum og auglýsir kjörnefndin eftir fólki sem vill taka sæti í varastjórn. Eru áhugasamir beðnir að hafa samband við Anný Ingimarsdóttur á netfangið anny@arborg.is í dag eða á morgun.

Nánari upplýsingar um þingið, s.s. dagskrá, fulltrúafjölda félaga og tillögur sem lagðar verða fram má finna á heimasíðu HSK undir liðnum viðburðir.