HSK/Selfoss í öðru sæti á Meistaramóti Íslands 11-14 ára

11 ára stúlkur urðu Íslandsmeistarar í sínum flokki. Á myndinni eru frá Selfossi þær Ingibjörg Lára, Helga Þórbjörg og Írena Dröfn.

Iðkendur Frjálsíþróttadeildar Selfoss fjölmenntu um helgina á MÍ 11-14 ára. Mótið var haldið í Laugardalshöll helgina 31.janúar – 1.febrúar. Lið HSK/Selfoss lenti í 2 sæti í heildarstigakeppninni með 511 stig. Keppendur sem lenda í 10 efstu sætum í hverri grein ná í stig fyrir sitt félag. Lið Ármanns sigraði með 796,5 stig. 11 ára stúlkur urðu Íslandsmeistarar í sínum flokki og það urðu 12 ára stúlkur einnig. 11 ára piltar og 13 ára stúlkur urðu í öðru sæti í sínum flokkum og 14 ára piltar urðu í þriðja sæti í sínum flokki.

11 ára flokkur:

Ingibjörg Lára Rúnarsdóttir vann til silfurverðlauna í fjölþrautinni. Hún varð Íslandsmeistari í 400m hlaupi á tímanum 1:14,62 mín og einnig í 4x200m boðhlaupi með blönduðu liði HSK/Selfoss. Hún vann auk þess til bronsverðlauna í 60m hlaupi á tímanum 9,57sek. Helga Þórbjörg Birgisdóttir varð í fjórða sæti í fjölþrautinni. Hún varð Íslandsmeistari í 4x200m boðhlaupi með blönduðu liði HSK/Selfoss auk þess sem hún vann til silfurverðlauna bæði í langstökki er hún stökk 3,65m og í kúluvarpi er hún varpaði kúlunni 7,28m. Írena Dröfn Arnardóttir náði 7.sæti í fjölþrautinni. Hún vann til bronsverðlauna í kúluvarpi með 7,13m löngu kasti auk þess sem hún vann til bronsverðlauna í 4x200m boðhlaupi með blönduðu liði HSK/Selfoss. Grímur Örn Ægisson varð í 9.sæti í fjölþrautinni. Hann vann einnig til bronsverðlauna í kúluvarpi er hann varpaði kúlunni 7,76m.

13 ára flokkur:

Hilmar Dreki Guðmundsson vann bronsverðlaun í kúluvarpi er hann þeytti kúlunni 8,73m og Bjarkey Sigurðardóttir vann til silfurverðlauna í 4x200m boðhlaupi í stúlknaflokki með liði HSK/Selfoss.

Ingibjörg Lára Rúnarsdóttir varð tvöfaldur Íslandsmeistari í flokki 11 ára

11 ára strákar náðu öðru sæti í stigakeppninni. Frá Selfossi á myndinni eru þeir Guðjón Arnar og Grímur Örn

Bjarkey er hér á verðlaunapalli í 4x200m boðhlaupi 13 ára stúlkna ásamt liðsfélögum úr HSK/Selfoss 

Hilmir Dreki á verðlaunapalli með bronsverðlaunin fyrir kúluvarp í flokki 11 ára pilta