Fræðslu- og forvarnarstefna Umf. Selfoss

Lög, reglur og stefnur félagsins

Fræðslu- og forvarnarstefna Umf. Selfoss

Íþróttastarf er uppeldisstarf og á það við um allar íþróttagreinar. Í öllu íþróttastarfi læra börn og unglingar að fylgja settum reglum og tileinka sér hollar lífsvenjur. Þjálfarar hafa því mikilvægu uppeldishlutverki að gegna og eru fyrirmyndir barna og unglinga í orði og verki.

Skýr stefna í fræðslu- og forvarnarmálum

Umf. Selfoss hefur mótað sér stefnu í fræðslu- og forvarnarmálum og hefur það að leiðarljósi að starfa samkvæmt stefnuyfirlýsingu ÍSÍ um forvarnir og fíkniefni.

Stefna Umf. Selfoss í vímuvörnum

Forvarnargildi íþrótta

Íþróttir gegna mikilvægu hlutverki í vímuvörnum. Rannsóknir á högum barna og ungmenna sýna að þeim ungmennum sem eru virk í íþróttastarfi reiðir betur af í daglegu lífi og neyta síður vímuefna. Einnig er ljóst að neysla áfengis, tóbaks eða annarra vímuefna hefur skaðleg áhrif á árangur í íþróttum.

Ungmennafélag Selfoss vill taka mjög skýra afstöðu gegn neyslu allra vímuefna í tengslum við íþróttir. Í þessari stefnuyfirlýsingu er talað um vímuefnaneyslu og er þá átt við neyslu áfengis, tóbaks og annarra vímuefna sem og neyslu hormónalyfja sem ekki eru tekin í lækningalegum tilgangi eftir tilvísun læknis.

Skýr afstaða: Íþróttir og neysla áfengis, tóbaks eða annarra vímuefna fara ekki saman. Félagið hvetur þjálfara sína og iðkendur til að forðast öll þau efni sem dregið geta úr árangri þeirra í íþróttinni og skaðað heilsu þeirra.

Þjálfarar og eldri iðkendur eru fyrirmyndir yngri iðkenda bæði í orði og verki. Félagið hvetur þá til að standa vörð um þá miklu ábyrgð sem þeir bera gagnvart iðkendum.

Aftur efst

Neysla áfengis, tóbaks og annarra vímuefna

Félagið er andvígt allri neyslu áfengis, tóbaks og annarra vímuefna allra iðkenda, þjálfara, fararstjóra og annarra félagsmanna eða aðila sem koma að íþróttastarfi á vegum félagsins. Öll neysla vímuefna hvers konar er bönnuð í tengslum við æfingar, fjölskyldumót og keppnir á vegum félagsins.

Áfengis- og tóbaksneysla á ekki að eiga sér stað í tengslum við íþróttastarf félagsins, svo sem:

áfengissala í tengslum við íþróttakeppnir,
áfengisneysla í lokahófum,
reykingar og munntóbaksneysla á íþróttasvæðum,
áfengis- eða tóbaksauglýsingar á eða við velli eða á búningum.

Viðbrögð félagsins við neyslu iðkenda

Félagið mun bregðast sérstaklega við allri vímuefnaneyslu iðkenda undir 20 ára aldri. Þá verða foreldrar félagsmanna undir 18 ára aldri undantekningarlaust látnir vita af slíkri neyslu.

Kvikni grunur um neyslu ólöglegra vímuefna skulu þjálfarar hafa samráð við fagaðila, þar með talið lögreglu, um viðbrögð við slíkum málum.

Varðandi viðbrögð við vímuefna- og tóbaksneyslu þeirra sem eru sjálfráða mun félagið bregðast við neyslu sem er brot á reglum félagsins og neyslu sem hefur áhrif á ástundun, frammistöðu og ímynd félagsins.

Markmið viðbragða: Viðbrögð félagsins skulu miðast við að aðstoða iðkandann við að laga sig að reglunum og að hann fái færi á að halda áfram starfi innan félagsins.

Viðbrögð félagsins við brotum á reglum þessum verða í formi tilmæla og ábendinga. Skili viðbrögð ekki árangri getur komið til tímabundins banns frá æfingum og/eða keppni. Félagið mælir ekki með iðkendum í landslið hafi þeir orðið uppvísir að neyslu ólöglegra vímuefna.

Aftur efst

Hlutverk og ábyrgð þjálfara

Þjálfarar gegna lykilhlutverki í forvörnum, fræðslu og daglegu starfi með börnum og ungmennum. Þeir eru fyrirmyndir og bera ábyrgð á að fylgja stefnu félagsins í starfi sínu.

Þjálfarar skulu vinna eftir vímuvarnarstefnu félagsins.
Þjálfarar skulu bregðast við vímuefnaneyslu iðkenda á viðeigandi hátt.
Félagið mun sjá þjálfurum fyrir fræðsluefni um áhrif vímuefnaneyslu á árangur í íþróttum sem þjálfarar miðla síðan áfram til iðkenda.
Þjálfarar skulu framfylgja stefnu félagsins varðandi samstarf foreldra og annarra aðila sem sinna málefnum barna og unglinga.
Þjálfarar skulu gæta þess að vera iðkendum til fyrirmyndar jafnt á æfingum og í daglegu lífi.

Aftur efst

Samstarf við foreldra og fagaðila

Samstarf við foreldra

Félagið mun upplýsa foreldra um stefnu félagsins í vímuvörnum og leggja áherslu á gott samstarf við foreldra iðkenda með fræðslu um áhrif áfengis, tóbaks og annarra vímuefna á árangur í íþróttum.

Fræðsla og stuðningur

Félagið leggur áherslu á fræðslu til foreldra um þjálfun og æskilegt mataræði íþróttafólks og mun leitast við að starfa náið með fagfólki í vímuvörnum.

Samráð þegar þörf er á

Félagið mun hafa samráð við foreldra þurfi að taka á neysluvandamáli iðkenda undir sjálfræðisaldri.

Samstarf við aðra aðila

Félagið mun hafa náið samstarf við þá aðila sem sinna tómstundastarfi barna og unglinga og við fagaðila sem sinna börnum og unglingum.

Aftur efst

Hollir lífshættir

Árangur í íþróttum byggir ekki aðeins á góðri þjálfun heldur einnig góðum og heilbrigðum lífsháttum. Næg hvíld og svefn, hollt mataræði, reglulegar máltíðir og næg vatnsdrykkja skipta máli til að ná þeim árangri sem stefnt er að.

Á æfingum benda þjálfarar á mikilvægi þessara þátta og hvetja iðkendur til að temja sér hollt mataræði, neyta reglulegra máltíða auk nægrar vatnsdrykkju. Einnig er bent á mikilvægi svefns.

Svefn og hvíld: Meðalsvefnþörf fullorðinna er talin um 7,5 klukkustundir. Börn og unglingar þurfa meiri svefn en fullorðnir. Besti mælikvarðinn á góðan svefn er að vakna úthvíldur og líða vel yfir daginn.

Þjálfarar skulu hvetja börn til að ganga eða hjóla á æfingar í stað keyrslu og vera þeim góð fyrirmynd þar.

Aftur efst

Álagsmeiðsli, offita og átröskun

Álagsmeiðsli

Álagsmeiðsli eru algeng í íþróttum og geta myndast þegar iðkandi æfir á meira álagi en líkami hans þolir. Góð grunnþjálfun, góð upphitun, liðleikaþjálfun og rétt uppbygging æfinga geta minnkað hættu á álagsmeiðslum.

Offita

Offita barna og unglinga er vaxandi vandamál. Mikilvægur fyrirbyggjandi þáttur gegn offitu er hreyfing og þátttaka í skipulögðu íþróttastarfi.

Átröskun

Átröskun er alvarlegur sálrænn sjúkdómur sem getur valdið heilsutjóni. Hún er algengari meðal íþróttafólks en annarra, sérstaklega í íþróttum þar sem líkamsvöxtur skiptir máli.

Viðbrögð þjálfara

Þjálfarar hafa samráð við yfirþjálfara ef þeir telja ástæðu til að bregðast við aðstæðum iðkenda sem draga úr heilbrigði. Ef aðstæður eru alvarlegar skal hafa samband við foreldra eða forráðamenn iðkenda.

Aftur efst

Vinátta, virðing og samskipti

Hjá Umf. Selfoss er lögð áhersla á vináttu, gagnkvæma virðingu og góð samskipti. Einelti er ekki liðið. Mikilvægt er að íþróttaiðkun sé skemmtileg fyrir iðkendur og að þeim líði vel.

Einnig er mikilvægt að þjálfarar hvetji iðkendur með jákvæðum hætti og að iðkendur hrósi hver öðrum þegar vel er gert. Með félagsstarfi er stefna félagsins að byggja upp jákvæðan félagsanda, stuðla að vináttu og efla liðsanda auk þess að iðkendur hafi gaman af líðandi stund.

Gagnkvæm virðing: Mikilvægt er að gagnkvæm virðing einkenni öll samskipti innan félagsins, hvort sem um er að ræða samskipti milli eða innan stjórnar, deilda, þjálfara, iðkenda, foreldra, styrktaraðila eða annarra samstarfsaðila.

Aftur efst

Einelti

Einelti er síendurtekið ofbeldi þar sem einn eða fleiri níðast á eða ráðast ítrekað á einhvern einstakling. Ofbeldið getur verið félagslegt, líkamlegt, efnislegt eða andlegt.

Félagslegt einelti

Einstaklingur er skilinn útundan, honum er strítt, gert lítið úr honum eða gerðar særandi athugasemdir.

Líkamlegt einelti

Einstaklingi er hrint, sparkað í hann, hann hárreittur, klipinn eða honum haldið föstum eða lokaður inni.

Efnislegt einelti

Eigur viðkomandi, til dæmis íþróttaföt, taska, skór eða föt, eru ítrekað eyðilagðar, faldar eða teknar.

Andlegt einelti

Einstaklingur er þvingaður til að gera eitthvað sem stríðir gegn réttlætiskennd hans eða fær neikvæð skilaboð og hótanir.

Ef grunur um einelti vaknar

Skal tilkynna það strax til þjálfara eða yfirþjálfara.

Yfirþjálfari og þjálfarar þolanda og gerenda fara yfir hvernig eineltið birtist og hvað sé til ráða.

Samband er haft við foreldra eða forráðamenn þolenda og gerenda.

Þjálfari ræðir við allan hópinn um mikilvægi góðra samskipta.

Hópurinn setur sér reglur um samskipti sem verða samningur milli iðkenda.

Ef ekki tekst að stöðva eineltið þarf að kalla eftir aðstoð frá fagaðilum.

Ábyrgð þjálfara: Þjálfarar skulu sérstaklega gæta þess að tryggja viðhlítandi aga og koma í veg fyrir einelti. Þjálfari eða staðgengill hans skal vera mættur tímanlega á æfingar og fylgja sínum hópi til búningsklefa og vera til staðar meðan iðkendur hafa fataskipti ef því verður við komið.

Ef foreldrar eða forráðamenn verða varir við einelti utan æfinga sem gæti haft áhrif á eða teygt sig inn í æfingastarfið eru þeir hvattir til að láta þjálfara vita svo hægt sé að átta sig fyrr á því sem gæti verið að gerast og taka strax á einelti ef það kemur upp.

Aftur efst

Samþykkt

Fræðslu- og forvarnarstefna Umf. Selfoss var samþykkt á fundi aðalstjórnar Umf. Selfoss þriðjudaginn 4. nóvember 2008.

Heilbrigt og jákvætt íþróttaumhverfi

Með fræðslu- og forvarnarstefnu Umf. Selfoss er lögð áhersla á að börn og unglingar fái öruggt, heilbrigt og uppbyggilegt umhverfi til íþróttaiðkunar. Þjálfarar, foreldrar, iðkendur og félagið í heild bera sameiginlega ábyrgð á því að standa vörð um þá stefnu.

Fræðslu- og forvarnarstefna Umf. Selfoss