Öruggur sigur Selfyssinga

Aldursflokkamót HSK

Aldursflokkamót HSK í frjálsum íþróttum fór fram í frjálsíþróttahöllinni í Kaplakrika laugardaginn 10. janúar síðastliðinn. Lið frá ellefu félögum mættu til leiks og voru keppendur eitt hundrað talsins á mótinu. Nýja frjálsíþróttahöllin í Hafnarfirði iðaði því bókstaflega af lífi á meðan Sunnlendingar öttu kappi í hinum ýmsu keppnisgreinum frjálsra íþrótta.

Stigakeppni félaga fór þannig að Umf. Selfoss sigraði mótið með 344 stigum en í öðru sæti varð Umf. Hrunamanna með 175,5 stig. Sá árangur Hrunamanna er einstaklega athyglisverður þar sem það var fyrst árið 2013 sem Hrunamenn byrjuðu að senda aftur keppendur á héraðsmót eftir langt hlé. Frjálsíþróttastarf í Hrunamannahreppi er því greinilega að blómstra og vonandi að fleiri félög taki sig til og rífi upp starfið. Í þriðja sæti heildarstigakeppninnar varð svo Umf. Þór með 85,5 stig.

Þetta mót gefur góð fyrirheit fyrir Meistaramót Íslands 11-14 ára sem haldið verður 14. febrúar en þangað stefnum við í HSK á að senda öflugt lið.

Heildarstigakeppi félaga:

1. Selfoss.......................................344 stig
2. Umf. Hrunamanna..................175,5 stig
3. Þór...........................................85,5 stig
4. Laugdæla..................................79,5 stig
5. Íþr.f. Dímon..............................78,5 stig
6. Hekla...........................................57 stig
7. Íþr.f. Garpur................................35 stig
8. Gnúpverja....................................16 stig
9. Biskupstungna................................9 stig
10. Þjótandi (Vaka, Baldur, Samhygð)...8 stig

Unglingamót HSK fór fram samhliða Aldursflokkamóti HSK í frjálsíþróttahöllinni í Kaplakrika 10. janúar. Níu lið sendu keppendur til leiks og voru 45 keppendur skráðir á mótið sem er lítilleg fjölgun frá síðasta ári.

Umf. Selfoss náði að endurheimta efsta sæti stigakeppninnar að nýju eftir að hafa misst titilinn til Umf. Þórs á síðasta ári. Selfoss fékk 256 stig að þessu sinni en í öðru sæti varð íþróttafélagið Garpur með 123 stig. Umf. Þór náði svo þriðja sætinu með 69 stig.

Skemmtilegt mót en gaman hefði verið að sjá fleiri þátttakendur í elstu aldursflokkunum.

Heildarstigakeppi félaga:

1. Selfoss..........................................254 stig
2. Íþr.f. Garpur.................................122 stig
3. Þór.................................................69 stig
4. Þjótandi (Vaka, Baldur, Samhygð)...33 stig
5. Íþr.f. Dímon....................................31 stig
6. Umf. Hrunamanna..........................29 stig
7. Laugdæla........................................15 stig
8. Biskupstungna..................................3 stig

Frétt af vef HSK

---

Myndir af vef Sunnlenska.is.