Selfoss vann með yfirburðum og metin halda áfram að falla

frjalsar_heradsmþinni_sigurlid15

Seinni dagur héraðsmóts HSK í frjálsum í flokki fullorðinna fór fram síðastliðið mánudagskvöld í Frjálsíþróttahöllinni í Kaplakrika.

Frá þessu er greint á vef HSK en þar kemur einnig fram að gott samstarfi var við Frjálsíþróttadeild FH um framkvæmd þessara móta og eru væntingar um frekara samtarf í framtíðinni.

Selfyssingurinn Ólafur Guðmundsson heldur áfram að setja HSK met í sínum aldursflokki, en hann setti  ellefu HSK met á fyrri degi og þar af tvö Íslandsmet. Ólafur setti Íslandsmet og þar með HSK met í 60 metra grindahlaupi í flokki 45-49 ára, en hann varð HSK meistari á 9,22 sek. Hann setti einnig HSK met í sama flokki í 200 metra hlaupi, hljóp á 25,63 sek.

Guðmann Óskar Magnússon úr Dímon þríbætti HSK met Ólafs Elí, bróðir síns, í stangarstökki í flokki 45-49 ára, en hann stökk hæst 2,80 metra.

Umf. Selfoss sigraði heildarstigakeppni mótsins með yfirburðum en um 100 stig skildu að fyrsta og annað sætið.

Úrslit stigakeppninnar:

1. Selfoss         187 stig
2. Þór                  89 stig
3. Dímon            49 stig
4. Þjótandi           7 stig
5. Suðri                 4 stig

Aðeins eitt frjálsíþróttamót er eftir á vegum HSK í vetur en það eru Héraðsleikar 10 ára og yngri sem verða haldnir í Hamarshöllinni þann 7. mars næstkomandi og við hvetjum sem flesta krakka til þátttöku á því móti.