Um 70 kepptu í nýrri og endurbættri mótokrossbraut á Selfossi

Fjórða umferð Íslandsmótsins í mótokrossi fór fram laugardaginn 21. júlí í braut mótokrossdeildar UMFS á Selfossi. Félagsmenn deildarinnar voru afar stoltir að geta boðiðupp á eina af bestu brautum landsins. Tíu ár eru frá því að síðasta Íslandsmót var haldið á Selfossi.

Eftir stækkun brautarinnar og miklar endurbætur með hjálp Sveitarfélagsins Árborgar og margra fyrirtækja er hún nú orðin hluti af Íslandsmótinu. Brautin var í toppstandi og tæplega 70 keppendur voru skráðir til leiks þó veðurspáin væri ekkert sérstaklega góð. Lukkan var þó með móts-höldurum því ekki fór að rigna og blása fyrr en rétt í lokin og gerði þaðkeppnina mun skemmtilegri.

Þrír keppendur frá mótokrossdeild UMFS tóku þátt í keppninni og áttu öll góðan dag. Þorsteinn Helgi Sigurðarson keyrði af miklu öryggi eftir að helsti keppinautur hans lenti í vandræðum með gírpetala og uppskar Þorsteinn Helgi fyrsta sætið í 85cc flokki. Einey Ösp Gunnarsdóttir, sem keppti í kvennaflokki og hefur verið að bæta sig jafnt og þétt í sumar, uppskar þriðja sætið. Ragnar Páll Ragnarsson keppti í mx-unglingaflokki sem er mjög öflugur flokkur. Ragnar Páll hefur æft stíft og er sífelt að bæta sig. Hann endaði í fimmta sæti eftir daginn.

Þess má geta að 30 mínútna þáttur um mótið verður sýndur á RÚV þann 26. ágúst. Hægt er að nálgast yfir 700 myndir frá mótinu á motosport.is. Eins eru ítarlegri úrslit að finna á msisport.is. Þann 5. ágúst verður aftur keppt í mótokrossi á Unglingalandsmótinu sem haldið er á Selfossi í ár. Er undirbúningur nú þegar hafinn.

Í hléi afhentu Eyþór Arnalds og Ásta Stefánsdóttir mótokrossdeildinni peningastyrk að upphæð 500.000 kr. frá Sveitarfélaginu Árborg í tilefni þess að deildin hlaut útnefningu sem fyrirmyndardeild ÍSÍ.

mrm

Efsta mynd: Þorsteinn Helgi sem sigraði 85cc flokkinn. 
Næst efsta mynd: Einey Ösp sem varð í 3. sæti í kvennaflokki. 
Næst neðsta mynd:Ragnar Páll sem varð 5. í mx-unglingaflokki.
Neðsta mynd: Frá afhendingu fyrimyndarstyrks, frá vinstri, Kristín Bára, formaður Umf. Selfoss, Magnús Ragnar, formaður mótokrossdeildar, Eyþór, formaður bæjarráðs Árborgar, og Ásta, framkvæmdastjóri Árborgar.