Eva María með sigur og mótsmet á Penn Classic

Eva María Baldursdóttir sigraði glæsilega í hástökki er hún tók þátt í  Penn Classic  í Fíladelfíu um helgina. Eva María, sem keppir fyrir háskólann í Pittsburgh, stökk til sigurs er  hún stökk yfir 1.80m og setti nýtt mótsmet í leiðinni.  Eva María jafnaði sinn besta árangur innanhúss en hún hefur hæst stokkið 1.84m utanhúss. Hún átti síðan mjög góðar tilraunir við næstu hæð sem var 1.84m.  Þetta er annar sigurinn í röð hjá  Evu Maríu á þessu innanhússtímabili en hún vann Penn State National Open í lok janúar með  1,79 metra stökki.  Næst keppir Eva María eftir 2 vikur á ACC championships og freistar þess að bæta sig á því móti og ná árangri til að komast inn á lokamótið innnahúss. 16 bestu hástökkvarar úr öllum háskólum bandaríkjanna komast inn á lokamótið.