Eva María og Eric Máni íþróttafólk Umf. Selfoss
Frjálsíþróttakonan Eva María Baldursdóttir og mótokrossmaðurinn Eric Máni Guðmundsson, hafa verið valin íþróttakona og íþróttakarl Umf. Selfoss árið 2025. Verðlaunin voru afhent á verðlaunahátíð Umf. Selfoss sem fram fór í félagsheimilinu Tíbrá fyrr í kvöld.
Eva María er efst á afrekalista íslenskra kvenna í hástökki á árinu 2025 og í 15. sæti á Evrópulista í flokki 20-22 ára. Hún er í Afrekshópi unglinga hjá Frjálsíþróttasambandi Íslands. Eva María náði lágmarki og keppti á Evrópumeistaramóti yngri en 23 ára, einnig náði hún að komast inn á lokamót NCAA (stærstu háskólakeppni Bandaríkjanna). Hún er í þriðja sæti yfir bestan árangur kvenna í hástökki á Íslandi frá upphafi.
Eric Máni skipar sér í röð þeirra bestu á Íslandi í mótokross. Hann varð Íslandsmeistari í MX2 á árinu og keppti fyrir Íslands hönd í Motocross of Nations, sem er stærsta liðakeppni í heimi og var haldin í Bandaríkjunum á árinu. Eric Máni var kjörinn akstursíþróttamaður ársins 2025 hjá MSÍ, einnig er hann fimmfaldur Íslandsmeistari í mótokross.
Níu karlar og sjö konur voru tilnefnd í kjörinu af deildum félagsins og tóku þau við viðurkenningum á verðlaunahátíðinni.
Tilnefnt íþróttafólk deilda Umf. Selfoss.