Þjálfararáðstefna í Árborg

Þjálfararáðstefna fyrir alla sem þjálfa íþróttir innan vébanda Sveitarfélagsins Árborgar verður haldin dagana 11.-12. október. Þema ráðstefnunnar er samvinna – liðsheild - árangur.

Markmið ráðstefnunnar eru margþætt en má þar m.a. nefna:

• Efla símenntun þjálfara í Árborg
• Auka þekkingu og kunnáttu þjálfara í sveitarfélaginu
• Opna á samskipti á milli þjálfara í mismunandi íþróttum
• Efla samstarf þjálfara við aðra aðila innan sveitarfélagsins sem starfa með börn og unglinga, svo sem grunnskóla, barnavernd/félagsþjónustu og félagsmiðstöð
• Skýra verkferla til að taka á vandamálum sem upp geta komið í íþróttastarfssemi svo sem eineltismál

Á ráðstefnuna verður boðið þeim nálægt 75 þjálfurum sem er að finna í sveitarfélaginu Árborg og eru yfir 18 ára aldri. Einnig verður í boði fyrir þjálfara úr öðrum sveitarfélögum á Suðurlandi að taka þátt á ráðstefnunni á laugardeginum.

Dagskráin á föstudeginum er eingöngu miðuð að þjálfurum úr Sveitarfélaginu Árborg þar sem skoðaðir verða samstarfsmöguleikar við stofnanir og aðra aðila sem vinna með börnum og unglingum í sveitarfélaginu og hvernig er hægt að vinna markvisst saman með hag unga fólksins að leiðarljósi. Páll Ólafsson frá Barnaverndarstofu mun flytja erindi og að lokum verður farið í öflugt hópefli.

Á laugardeginum er meira farið í þjálfunartengd málefni með erindum frá fjölbreyttum hópi virtra fyrirlesara.

Þeir sem munu flytja erindi eru:

• Sigurður Ragnar Eyjólfsson, fyrrverandi þjálfari kvennalandsliðsins í knattspyrnu
• Gunnar Páll Jóakimsson, þjálfari Anítu Hinriksdóttur hlaupara
• Hrafnhildur Ósk Skúladóttir, fyrirliði landsliðsins í handknattleik
• Viðar Halldórsson íþróttafélagsfræðingur

Á laugardeginum er þjálfurum frá öðrum sveitarfélögum á Suðurlandi boðið að taka þátt. Undirbúningshópur ráðstefnunnar skorar á þjálfara og aðra áhugasama að taka þátt í ráðstefnunni. Ráðstefnan verður betur auglýst á næstu dögum. Skráning sendist á netfangið umfs@umfs.is.

Fyrir hönd undirbúningshóps þjálfararáðstefnu Árborgar,
Gunnar E. Sigurbjörnsson
tómstunda- og forvarnarfulltrúi Árborgar