Bryndís Embla með Íslandsmet í spjótkasti

Bryndís Embla er stórefnilegur spjótkastari

1.sumarmót ÍR var haldið þann 21.maí síðastliðinn.  Fjórir keppendur frjálsíþróttadeildar Selfoss tóku þátt og stóðu sig vel.  Hæst bar Íslandsmet Bryndísar Emblu Einarsdóttur í spjótkasti í flokki 16-17 ára.  Bryndís Embla kastaði spjótinu (500 gr) 46,32m og bætti Íslandsmet Arndísar Diljá Óskarsdóttur frá árinu 2021 um 39cm.  Hún bætti einnig eigið HSK met í flokknum en fyrra met hennar var 44,75m.  Bryndís Embla er á yngra ári í flokknum og keppnistímabilið nýbyrjað þannig að gera má ráð fyrir að hún muni kasta enn lengra á næstu vikum.

Kristján Kári Ólafsson keppti í þremur kastgreinum og bætti sig í þeim öllum.  Hann kastaði karlasleggjunni 35,80m sem er nýtt HSK met í flokki 16 -17 ára en fyrra metið var 32,29 í eigu Benjamíns Guðnasonar.  Kristján Kári fékk silfurverðlaun fyrir kastið en faðir hans, Ólafur Guðmundsson, náði 3.sæti með 30,28m löngu kasti. Kristján Kári keppti í kúluvarpi í flokki 16-17 ára þar sem hann kastaði 13,53m og varð í öðru sæti, sama sæti og hann fékk fyrir að kasta kringlunni 33,69m í flokki 16-17 ára.  Að lokum þá kastaði Daníel Breki Elvarsson karlaspjótinu 49,17m og sigraði í karlaflokki.

Kristján Kári Ólafsson hefur byrjað keppnistímabilið af miklum krafti og þegar sett tvö HSK met í sleggjukasti